SAT AMIKARO

Protokolo pri la SAT-Amikara kongreso 2013

Vinko — 2013-07-09T08:22:12Z

Ĉi-kune estas provizita informocele detala protokolaro pri la kongreso en Metabjeo, kompletige al la la resumo aperigota en la numero 95 de la SAGO. Legantoj konsciu ke ĝi estas ne finpolurita, kaj verŝajne mankohava. Faktaj aŭ lingvaj korektoproponoj eblas plu kaj estas bonvenaj. Tiurilataj laboremuloj ankaŭ povas helpi sin de kongresregistraĵoj por la du plenkunsidoj, haveblaj laŭ simpla peto ĉe vinkomarkov ĉe yahoo punkto fr.

- Kongreso de SAT-Amikaro 2013 Metabjeo

El La Sago 91 : kongrespaĝoj

2013-01-21T21:47:39Z

Kongresaj paĝoj el La Sago 91

Ni ĉi tie disponigas podofe la kongrespaĝojn troveblajn (kune kun la aliĝilo) en LS91, speciale prikongresa numero (alklaku la ligon aŭ la bildon) :
– Prikongresaj paĝoj el LS91

Aliĝilo rete elŝuteblas !

2013-01-20T21:57:31Z

Jen ni disponigas la aliĝilon en PDF-formo. Por elŝuti ĝin alklaku la ligon aŭ la bildon :
– http://www.esperanto-sat.info/IMG/pdf/Aligxilo.pdf

Kongresglumarko haveblas !

2013-01-06T15:53:57Z

La tradicia kongresmarko, sub formo de kolora gluetikedo uzebla por ornami kovertojn ks, jam estas mendebla pere de la aliĝilo k rekte ĉe la OKK (vidu adreson paĝopiede). Jen ĝi (desegnita de S. Sir', realigita de J.F. Blin) :

Por tiu "lima" kongreso emblemas loka urogalo (ankaŭ nomata "taŭra koko"), ĉar ja birdoj prifajfas landlimojn !
Alia simbolaĵo de tiu kongresmarko estas la neĝostelo meze de la Eo-stelo, kiu estas fakte la emblemo de la urbo Metabjeo, kies uzadon la urbodomo afable permesis.

– La prezo estas 1 eŭro por 10 ekzempleroj.

Bedaŭrinde la anoncitaj poŝtmakoj ne estos disponeblaj. Ni proponos repagon aŭ aliajn kompensojn al tiuj kiuj jam mendis.

Mapoj de la regiono k kongresurbo

2013-01-06T15:36:04Z

Agrandir le plan

Kiel atingi la kongreslokon Métabief

2013-01-06T15:26:37Z

Trajne

El Parizo (gare de Lyon) per TGV al Frasne.
Frasne situas sur la linio Parizo – Lausanne.
En Frasne prenu buson al Métabief – Jougne – Vallorbe.
Métabief estas nia kongresloko. Jougne estas pasejo kaj landlimo. Vallorbe jam estas en Svislando.
Elbusiĝu en Métabief Urbodomo (Mairie).
La veturado daŭras proks. 40 minutojn.
Estas ĉiun tagon po 4 veturadoj en ĉiu direkto.
El la urbodomo estos vojmontriloj al Azureva kun indiko ESPERANTO.
Veturilo venos el la kongresejo samtempe kiel la busoj alvenos el Frasne urbodomo kaj la ŝoforo prenos vian valizon.

Aŭte

Distanco Pontarlier – Métabief : 18 km
En Pontarlier sekvu la direkton Vallorbe Lausanne Suisse : Uzu la straton N57 kaj poste E23
Post 14 km uzu la straton D45 en la direkto de LES HÔPITAUX-NEUFS ET VIEUX, SAINT-ANTOINE TOUILLON-ET-LOUTELET, MÉTABIEF-MONT D'ORIGNY
Ĉe la rondirado uzu la 3an elirvojon al SAINT-ANTOINE, TOUILLON-ET-LOUTELET MÉTABIEF-MONT D'ORIGNY
Poste venas dum 3 km multaj kurboj.
Traveturu Saint–Antoine.
Ĉe la rondirado uzu la 3an elirvojon : D9.
Veturu malrapide !
Tuj poste turnu dekstren : D385
Veturu malrapide : vi forlasas Saint-Antoine kaj samtempe eniras la urbeton Métabief.
En Metabief, ne uzu GPS por Azureva (ne bone ĝisdatigita), sekvu la sagojn !

Informriĉa naturo

2013-01-06T15:07:17Z

Eŭropo travivis kvar malvarmajn eraojn dum la Glacia Praepoko. La tria, kies nomo estas "Riso" (Riss), estis la plej ampleksa, tio estas, ke la glaĉeroj el la Alpoj sukcesis salti trans la montaro Ĵuraso kaj etendiĝis al la Nordo tra Francio, Germanio... Poste sekvis la kvara glacia erao "Vurmo" (Würm) iom pli modesta, kaj nia nuna epoko situas en la interglacia tempo post Vurmo. Laŭ tio oni povas supozi, ke eble iam venos kvina glacia erao, kiu scias, ne ni vidos tion... Niaj vivoj estas mallongaj kompare kun geologiaj epokoj...

Dum la tria Glacia Praepoko Riso la glaĉeroj estis dikaj kaj sufiĉe "viglaj" por supreniri sur la montojn de Ĵuraso, kiu naskiĝis antaŭ tiu Glacia Praepoko kiel eĥo al la naskiĝo de la Alpoj. Se oni memoras, ke la meza alteco de la Meza Ebenaĵo, kie situas Berno kaj Zuriko estas 425 m super marnivelo kaj la ĵurasaj montoj kulminas je 1200 ĝis 1600 metroj, tio estas vera grimpado ! Tamen en Ĵuraso troviĝas kelkaj lokoj, kie la glacio ne venis, ĉar eĉ dum tiu vigla Ris-periodo la glacio ne ĉie estis sufiĉe dika. Do formiĝis kvazaŭ insuloj sen glacio. Oni povas viziti ilin en la nuntempo. Multaj homoj, ĉefe biologoj kaj botanikistoj, vizitas tiujn lokojn, ĉar tie vidiĝas kaj vivas plantoj de tiu praepoko, de antaŭ la Glacia Praepoko.

Post legado de la ĉi-supraj klarigoj vi povas kompreni la alvenon de migraj ŝtonegoj. La lasta Glacia Praepoko Vurmo ne saltis super Ĵuraso, sed estis bremsita de ĝi. Kiel ĉiuj glaĉeroj la glacio de la Vurmaj glaciaj langoj surhavis sur si ŝtonoblokojn alpdevenajn, ĉefe el granito, nomitaj morenoj. La glacia lango antaŭeniras same kiel rivero, kvazaŭ fluas. Tamen pro varmiĝo de klimato malkreskas, do la fina bilanco estas negativa. Pro tio la granitaj rokoj alpdevenaj estis deponitaj laŭ la montaro Ĵuraso. Oni vidas kelkajn en la supera parto de la urbo Neŭŝatelo ekzemple, kaj laŭ tuta Ĵuraso ili vidiĝas kiel ornama ĉeno sud-oriente de la montaro. Ilin oni nomas "erratique" en la franca lingvo, kun signifo "perdita", ĉar la ŝtonegoj venis el alia regiono kaj estis transportitaj de la glaĉeroj.

Al ĉiuj infanoj en Neŭŝatelo oni rakontas, ke la fama grandega migra ŝtonego nomita "Pierre-à-Bot" turniĝas ĉiufoje, kiam ĝi aŭdas la sonorilojn de la urbo, kiuj anoncas noktomezon. Kaj tio estas vero !! La klarigon pri tio vi ricevos en Metabjeo dum nia kongreso, kaze ke vi tiam ankoraŭ ne trovis ĝin !...

Mirejo

– Ĉi teksto fontas el La Sago 91, p6.

Grava pasejo : Jougne

2013-01-06T15:05:37Z

Jougne estas vilaĝeto sur paseja strato inter Vallorbe, kantono Vaŭdo, Svislando, kaj Pontarlier, departemento Doubs, Regiono Franĉkonteo, Francio. Ŝajnas ke tiu pasejo jam estis uzita de Romianoj. Certe en la Mezepoko homoj povis el Svislando atingi Francion tra tiu aro da kluzoj kaj fendoj. Charles le Téméraire uzis tiun pasejon por ataki la Svisojn, kaj la batalo okazis en Grandson apud Yverdon, tuj sube de Vallorbe ĉe la neŭŝatela lago. Alia interesa evento okazis tie la 26an de aprilo 1945, kiam Marŝalo Pétain, tiam restadanta en Svislando, estis transdonita al Francio, la "liverado" de tiu historia personeco okazis en Jougne.

Nepras rimarki, ke la pasejoj en Ĵuraso estas altaj kaj proksimaj ĉe la pintoj. Jougne situas je 1012 metroj super marnivelo kaj la apuda monto Mont d'Or atingas 1460 metrojn. Do la diferenco atingas 448 metrojn. Kompare kun tio ni rigardu en la Alpoj : la pasejo Grimsel situas je 2165 metroj kaj la apudaj montoj atingas 4000 metrojn aŭ pli. Do la diferenco atingas kvazaŭ 2000 metrojn. En Ĵuraso la formoj estas rondaj, la faldoj paralelaj. Aperas "cluses" tranĉoj tra la faldoj. En la Alpoj la montoj estas rokaj, pintaj, kaj la valoj estas profundaj.

Tiu pasejo gravas pro tute alia kialo : la akvoapartigo. Sude de Jougne, en Vallorbe kaj apudaj regionoj de la kantono Vaŭdo la akvo fluas al rivero Orbe, kiu fluas sub la nomo Thielle en la neŭŝatelan lagon. Poste la akvo fluas al rivero Aare, poste Rejno kaj tiu lasta atingas la Nordan Maron en Roterdamo, Nederlando. Norde de la pasejo Jougne la akvo fluas al rivero Doubs, kiu fluas al Saône, kiu fluas al Rodano, kiu atingas la Mediteraneon. Do se vi staras en la pasejo Jougne, vi povas diri : la norda akvo fluas al la Sudo kaj la suda akvo fluas al la Nordo. La akvo de la valo de Ĉaŭdefono kaj Le Locle same fluas al Doubs kaj al la Sudo. Male la akvo de la valo de La Sagne kaj Les Ponts-de-Martel, tute apud Ĉaŭdefono, same la akvo de la valo de La Brévine, fluas subtere al Val-de-Travers, kies rivero Areuse fluas al la neŭŝatela lago do al la Nordo.

Mirejo

– Ĉi teksto fontas el La Sago 91, p6.

Nur liberaj homoj

2013-01-06T15:03:38Z

En la Meza Ebenaĵo de Svislando (le Plateau Suisse) vivis Helvetoj, alvenis Romianoj, poste regis feŭdismo kaj konstruiĝis kasteloj. Dum tiuj diversaj epokoj troviĝis en Ĵuraso nur sovaĝa naturo kun lupoj, ursoj, kapreoloj, vulpoj kaj aliaj bestoj. Edena ĝardeno ? Eble. Tamen pro la klimato ne ofte eblas vivi nuda en Ĵuraso.... brrrrrrrrrrrrrrrrr.... Vitofolio ne sufiĉe protektas kontraŭ subnulaj temperaturoj !

Do la pintoj de Ĵuraso ne konis feŭdismon. Dum tiu epoko, kie feŭdismo regis, la superuloj kelkfoje liberigis la subulojn kaj tiam diris al ili : "Iru al la montaro kaj tie vi povas faligi arbojn, konstrui lignan dometon, ĉasi, planti legomojn... iru, vi estas liberaj." Kaj tiel okazis. Pro tio ekzemple en Ĉaŭdefono (1000 metrojn super marnivelo) ne staras kastelo. Neniam regis tie feŭdismo. Oni povas konjekti, ke tio kontribuis al la etoso de la urbo : liberema, maldekstrema, inventema, sendependema. La nuntempaj streĉoj inter la supera arbara parto de la kantono Neŭŝatelo kaj la suba parto ĉelaga certe ligiĝas al tiu historia fakto.
Ni ne forgesu, ke en Ĉaŭdefono naskiĝis la arkitekto Le Corbusier, la inĝeniero Louis Chevrolet, la verkisto Blaise Cendrars... Plie mi aldonu, ke kelkaj artistoj el Laŭzano aŭ Ĝenevo venis al Ĉaŭdefono por vivi en tiu malfermita urbo pro la peza burĝa tradiciema etoso de la menciitaj urboj.

Pro tiu fekunda etoso esperantistoj ekagis en tiu grava ĵurasa urbo, kie nun staras du Esperanto-centroj.

Mirejo

– Ĉi teksto fontas el La Sago 91, p6.

Iom pri la urbeto Métabief

2013-01-06T14:53:36Z

Je 4 km de la svisa limo kaj je 2 km de la nacia strato numero 57, kiu ligas Pontarlier en Francio kun Vallorbe en Svislando situas Métabief, piede de monto Morond. Tiu vilaĝo estas konata pro la beleco de la ĉirkaŭanta verda pejzaĝo. La teritorio de la vilaĝo etendiĝas sur 574 hektaroj en alteco de 930 m ĝis 1420 m.

La nomo Métabief devenas de la praa franca lingvo « mete », kies signifo estas limoŝtono, kaj « bief », rivereto. La rivereto en Métabief nomiĝas la ruĝa Bief, ruĝa rivereto. Tiu rivereto estis limo inter « bariochage » de Pontarlier (bariochage estas unuiĝo de liberaj homoj) kaj la posedaĵo de Jougne, al kiu Métabief apartenis.
Oni povas supozi, ke tie estis tranoktebleco sur la strato inter Pontarlier kaj Laŭzano. Jean de Chalon, sire d'Arlay liberigis la loĝantojn de Métabief en 1393. Kompreneble la loĝantoj kreskigis cerealojn kaj legomojn por nutri sin, tamen plie ili trovis kaj elfosis feron ekde la dekkvina jarcento ; per tiu metalo homoj povis produkti la ilojn bezonatajn por la agrikulturo kaj arbaroprizorgado.

En tia regiono la centraj okupoj de la homoj estas agrikulturo, bredado de bovinoj por akiri lakton kaj viandon kaj ekspluatado de arbaroj. En Ĵuraso ambaŭflanke de la limo naskiĝas interesaj sociaj strukturoj nomitaj « Les communaŭ », kie ĉiuj kune, komune, zorgas kaj organizas la bezonatajn laborojn kaj decidojn.

En Métabief ekde la mezo de la dudeka jarcento naskiĝas alia grava okupo : turismo kaj vintraj sportoj. En la jaro 2009 loĝis tie ĉirkaŭ mil homoj. Tie staras 2200 feridomoj kaj diversaj fericentroj kaj hoteloj. Multaj diversaj sportebloj ekzistas kaj por la vintraj restadoj kaj por la someraj restadoj. Vendejoj kaj butikoj abundas, kie oni povas aĉeti la lokajn produktojn : fromaĝon (Comté), kolbasojn (saucisse de Morteau) kaj aliajn.

Distanco Pontarlier – Métabief : 18 km
Distanco Métabief – Mouthe : 15 km
Distanco Métabief – limo kun Svislando (Jougne) : 4 km

http://fr.wikipedia.org/wiki/M%C3%A9tabief

– Ĉi teksto fontas el La Sago 91, p8.